Igor Amarika lasaiagoa da eta Igor Serrano, berritsuagoa eta ausartagoa. “Berak partidak galtzen ditu; baita irabazi ere”, dio Amarikak. “Normalean ondo ateratzen da, baina batzuetan ez (kar-kar). Bizkaiko txapelketan, esate baterako, txarto atera zen: ni azkena izanda, hordagoa bota ziguten jokoan, nik 31koa nuela. Bikotekideak ez zuen onartu nahi, baina azkenean onartu eta galdu egin genuen. Nik uste dut karta onak badituzu, hordagoak onartu behar direla, hau da, aukerak ez dira alferrik galdu behar; bestela, geroago, damutu egiten zara”, esan du Serranok.
Dena dela, ondo moldatzen dira elkarrekin. Gaztetan futbolean ere jokatu zuten elkarrekin, Uritarra Larrabetzuko taldean. Eta musean ibilbide luzea eta oparoa dute, herriko txapelketa guztiak irabazi dituztelako. "Batzokikoa aitak birritan irabazi zuen eta guk, hurrengo urtean. Finala aitari irabazi genion eta 5 eta 0 irabazten ibiltzen ginela, aitak joko bat irabazten uztea eskatu zidan, baina nik esan nion ezetz; bestela, galtzeko arriskua genuelako (kar-kar). Irabazi genuen eta aitak zorionak eman zizkidan. Musean, lagunik eta seniderik ez!", adierazi du Serranok barrezka.
Gazteak zirela, sarritan jokatzen zuten musean. "Zapaturo 16:00etan gelditzen ginen eta arratsalde osoa ematen genuen jokatzen. Lehen txapelketa gehiago zegoen herrian, jaietan (Goitioltza, Kurtze...) eta zenbait tabernatan lehiak antolatzen zirelako. Taberna asko itxi egin dira eta berrietan ez dira egiten. Muserako zaletasunak ere behera egin du eta gazteek ez dute gure garaian beste jokatzen. Gaur egun, Enaitz tabernan baino ez da egiten Lezaman", esan du Amarikak.
Euskal Herriko txapelketa
Eta bertan, hain zuzen ere, jokatzen da Euskal Herriko Txapelketaren lehenengo fasea, Ekaitz Legarreta antolatzailearen eskutik. "Lehen saio batzuk egiten ziren, baina gaur egun, Lezaman, egun bateko ligaxka jokatzen dugu. Guztira, 10-12 bikotek hartu genuen parte bertan eta finalista biok Bizkaiko Txapelketarako sailkapena lortu genuen. Hori Bilbon jokatu zen eta lehenengo hamar bikoteok Euskal Herriko Txapelketaren finalera joateko aukera izan genuen". Azken hamar urteotan, Igor biak aritu dira bertan, baina bakarrik aurten heldu dira finalera.
"Finala Zornotzako frontoian, martxoaren 25ean, jokatu zen. Bikoteak multzoka banatu ziren eta guk arabarren, giputzen eta nafarren kontra jokatu genuen. Bakarrik partida bat irabazi genuen. Dena dela, giro polita dago", aipatu du Amarikak. "Bai, jai-eguna da, txapelketa aitzakia baino ez da lagunekin batzeko, elkarrekin egoteko eta, noski, musean jokatzeko. Gainera, Euskal Herria aldarrikatzeko ere balio du, mus txapelketa euskal herrialde guztien artean jokatzen den bakarra baita", erantsi du Serranok.
Euskal Herriko txapelketaren musa desberdina da, zortzi erregerekin jokatu beharrean, lau erregerekin jokatzen delako. “Batzuetan, erratzen zara, hirua erregetzat edo bia batekotzat jotzen duzulako. Beste era batean jokatu behar da, egokitu behar zara. Apustuak zuhurragoak izan behar dira, harriak berreskuratzea askoz zailagoa delako. Jokoak ere laburragoak dira, 30 harri lortu behar direlako, ez 40. Nik animatuko nuke jendea lau erregerekin probatzera: hasieran, ematen du aspergarria dela, baina polita da eta egokitzapena ez da gogorra".
Lezamarrek ez dituzte inoiz era berezi batean txapelketak prestatzen. Sekreturik ez dago, bakarrik "karta onak" eskuetan izatea. "Eta gomendagarria da bikotekidea ondo ezagutzea, euren kartak zeintzuk diren jakitea, horiek ere erabiltzeko. Horretarako, keinuak egin daitezke, baina arriskutsua da jendea adi-adi dabilelako eta keinua harrapatzen badute, abantaila alferrik galtzen delako". Beste gomendio bat eman dute, "inorekin ez fidatzea". "Aurten, andre nagusi biren kontra jokatu genuen, bien artean, 150 urte zituzten, eta izugarrizko jipoia eman ziguten". Euskal Herriko txapela falta zaie, baina errege-parea dira Igor Serrano eta Amarika.
Izatezko bikotea
Igor Serrano Lezamako harakinaren semea da. Berrogeita hamar urte ditu, eta "horietako 40an" musean jokatzen ibili da. Anaia txikiak erakutsi zion jokatzen eskolako errekreoan. Amarika Zamudion jaio zen, baina 12 urte zituela Lezamara joan zen bizitera. Igor biak lagunak dira betidanik eta elkarrekin hasi ziren musean jokatzen eta lehiaketetan parte hartzen. "Gazteak ginela, bikotekide bat behar zuen txapelketa baterako, deitu egin zidan eta handik aurrera beti elkarrekin jokatu dugu", esan du Amarikak.
Andrearekin baino denbora luzeago daramate elkarrekin, beraz. Izatezko mus-bikotea dira. Eta normalean, horrelakoetan ez dago ez dibortziorik, ez desleialtasunik. Tira, normalean. "2018an Bizkaiko txapelduna izan nintzen beste bikotekide batekin. Lagun batek deitu egin zidan ordezko ibiltzeko eta azkenean jokatzea egokitu zitzaidan. Azkenean irabazi egin genuen saioa”, adierazi du Serranok.
