Argazkiak: Ixone Urrutikoetxea
Uda jaietako garaia da Euskal Herrian. Txorierrin ere hainbat ekitaldi antolatu eta antolatzen ari dira. Ekainean Loiuren txanda da, bertan San Pedro eta Santa Luzia jaiak egiten baitira hilaren 23tik 30ra bitartean.
Aurten oso pertsonaia ospetsuak ikusteko aukera izango dugu Loiun, Julio Ibarra kazetaria eta Metro Bilbaoko komunikazio arduraduna, esate baterako. Iñaki eta Inaxio Perurena harrijasotzaileek ere lagunduko dute jaiak girotzen. Gainera, paella lehiaketa ekitaldirik jendetsuenetarikoa izango da, betiko moduan. Pregoia Ana Landa aurreko kultura teknikari eta gaur egun Berangoko alkateak emango du.
Ohiko datetan egingo dira aurten Loiuko jaiak. Iaz, egutegiaren kapritxoa zela-eta, ostiraletik astelehenera bitartean egon ziren ekitaldiak, baina aurten asteartean ere antolatu dira ekimenak. Egun bat gehiago, beraz, jaiez gozatzeko! Hala ere, jaiak hasi baino lehen, entsegua izango balitz moduan, San Juanada egingo da udaletxearen atzeko zelaian astebete lehenago, ekainaren 23an, alegia. Gau magiko horretan, txokolatea eskainiko zaie hortik hurbiltzen diren guztiei.
Benetako jaia ekainaren 26an hasiko da. Arratsaldeko 7:30ean Ana Landak pregoia irakurriko du, eta ongi etorria emango die jaiei udaletxeko balkoitik. Osterako, pala txapelketa antolatu du Irtxan taldeak. Kirola gustatzen ez zaienentzat, ordea, sardina jana eskainiko da ordu berean. Gaua heldu orduko, musikaren doinuak izango ditugu entzungai herrian: lehenik eta behin, Kresala taldeak jardungo du; era berean, 03:00tik aurrera, diskoteka batek lagunduko ditu gautxoriak.
Paellak nagusi
Hurrengo egunari, zapatuari, kalejirak emango dio hasiera, goizeko 10:00etan. Egun nagusia da larunbata, paella lehiaketa egiten baita. Normalean, 2.000 lagun biltzen dira udaletxearen inguruko landetan. Kodrilek 10:00etan eman behar dute izena, eta hortik aurrera egun osoan ibiliko dira lapikoen artean. Paellak 14:00etan aurkeztuko dira, eta Julio Ibarra animatzaile arituko da. Sariak 17:00etan banatuko dira. Baina jaia ez da orduan bertan behera geldituko, giro ederra ordu txikietara arte luzatuko da-eta. Arratsaldean The McKensis Clan Band Loiun gora eta behera ikusteko aukera egongo da. Era berean, Egan Berri eta La década prodigiosa taldeek saioak eskainiko dituzte gauean.
Igandean kalejira eta mezara joan ahal izango dira indarrik gabe gelditu ez direnak. Geroago, aita-seme Perurenatarrek harriak jasoko dituzte. Arratsalderako, haurrentzako baserri jokoak, Leke taldearen dantza-erakustaldia , eta pala txapelketaren finalak antolatu dira. Gauean, betiko legez, musika izango dugu entzungai, Luhartz taldearen eskutik, hain zuzen ere.
Astelehenean ere egingo dira kalejira eta meza. Ondoren, organo kontzertua eskainiko du Pedro Guallarrek. Musika-saioa entzun eta gero, bazkaltzeko ordua izango da, eta jai-batzordeak otordu bi proposatu ditu: bata, nagusiei zuzendua Zabaloetxe pilotalekuan; bestea, gainontzeko herritarrentzat antolatua udaletxearen inguruko zelaietan. Arratsaldean skate tailerrean parte hartu ahal izango dute kirol horren zaletuek, batez ere.
Asteartean amaituko dira jaiak. Goizean, kalejira eta meza egongo dira, eta arratsaldean Zaki magoa herritarrak harritzen saiatuko da. Ondoren, fanfarrea eta erraldoien tailerra izango ditugu. Txokolateak hasiera eman zion jaiari, eta amaiera ere emango dio. Era berean, 20:00etan Patxikori agurra egingo diogu.
Egitaraua
Ekainaren 23a, martitzena
21:30: San Juanada, txokolatea. Udaletxe atzeko zelaietan
Ekainaren 26a, barikua
19:30: Pregoiaren irakurketa, Ana Landaren eskutik
20:00: Sardina jana
20:00: Pala Txapelketaren finalerdia, Irtxan taldeak antolatua
23:00: Gau dantza, Kresala taldearekin
03:00: Diskoteka
Ekainaren 27a, zapatua
10:00: Kalejira
10:00: “Loiuko jaiak†V. Paella Txapelketa
11:00: Pintura Lehiaketa, haurrentzat
12:00: Herri-jolasak, haurrentzat
14:00: Paellen aurkezpena Julio Ibarraren laguntzarekin
16:00: Bitsaren jaia
17:00: Paella Txapelketaren sari banaketa
17:15: The McKensis Clan Band
21:00: The McKensis Clan Band
22:30: Gau dantza, Egan Berri taldearekin
00:00: La Década Prodigiosa
01:00: Gau dantza, Egan Berri taldearekin
Ekainaren 28a, domeka
10:00: Kalejira
11:00: Meza
13:00: Iñaki eta Inazio Perurena harrijasotzaileak
17:30: Haurrentzako baserri jokoak
18:30: Loiuko Leke dantza taldearen erakustaldia, plazan
19:00: Pala Txapelketaren finala, Irtxan taldearen eskutik
20:30: Gau dantza, Luhartz taldearekin
Ekainaren 29a, astelehena
10:00: Kalejira
12:30: Meza
13:15: Organo kontzertua, Pedro Guallarren eskutik
14:30: Nagusientzako bazkaria, Zabaloetxeko frontoian
14:30: Herri-bazkaria, udaletxe inguruko zelaietan
17.00-21:00: Skate tailerrak, skateko pistan
21:30: Hotza
Ekainaren 30a, martitzena
10:00: Kalejira
12:30: Meza
17:30: Zaki magoa
…eta ondoren erraldoien tailerra eta fanfarria
20:00: Patxikori agurra eta txokolatada