Propietate sendagarriak
Bizigarria da eta digestioari laguntzen dio. Karminatiboa ere bada; hau da, haizeak botatzen laguntzen du. Era berean, espasmoen kontrakoa da, eta hilekoa etortzeko lagungarria. Toniko moduan erabili dezakegu, digestio-astuna edo sabeleko mina badugu; olio sendagarriaren infusioa edo tantak edan daitezke. Oreganoak immunitate-sistema sendotzen du eta antibirala eta espektoratzailea da. Arintzen ez den eztula badugu, erabili dezakegu; baita min hauek izanez gero ere: eztarriko mina, faringitisa, bronkitisa eta asma. Kasu horietan ere edan ditzakegu olio sendagarriaren infusioa edo tantak.
Beste alde batetik, oso eraginkorra da bakterioen kontra. Antiseptikoa ere bada, eta erabili daiteke onddoen, parasitoen eta birusen aurka. Oreganoa baliagarria da kandida zabaltzea ekiditeko. Egunean behin edo bitan edan daiteke infusioa edo tindura. Gainera, artatzeko guneak oregano-infusioz edo -olio diluituz garbitu ditzakegu. Olioa onddo-infekzioak arintzeko ere baliagarria da, adibidez, oinetako onddoak arintzeko.
Infusioa: koilarakada bat oregano fresko ur katilukada bakoitzeko, edo koilarakada txiki bat, oregano sikua bada. Egunean bat edo bi katilukada edan dezakegu, otorduen aurretik edo ostean. Gainera, eztia bota ahal diogu eztitzeko.
Infusioa baliagarria da gaixotasunak prebenitzeko edo azkarrago osatzeko; onena da gaixotasunaren lehen sintoma nabaritu bezain laster edatea. Halaber, zauriak eta ziztadak garbitzeko erabili dezakegu, baita mina eta hauntura arintzeko ere. Hortzoiko mina izanez gero, gargarak egin ditzakegu.
Olio sendagarria: oregano sikua eta oliba-olio birjina estra. Osagaiak pote batean ipiniko ditugu: % 60 izango da olioa; eta % 40, oreganoa. Ontzi batean ura irakingo dugu eta sua amatutako dugu. Potea uretan sartuko dugu eta bertan 15 minutuan izango dugu. Uretatik atera, eta armairu batean gordeko dugu bi astean; egunero eragingo dugu. Iragazi, eta olioa dosifikagailu batean sartuko dugu. Egunean, 1-3 tanta hartu ditzakegu, uraz nahastuta. Badaezpada erabiliz gero, gehienez bizpahiru astean erabili daiteke. Ezin da urte osoan erabili, izan ere, oso eraginkorra denez, komenigarria da atse- denaldiak hartzea. Olio sendagarria oso aukera egokia da, eskura oreganoaren propietate guztiak izateko.
Erabilera kosmetikoak
Orbaintzea errazten duten propietate antioxidatzaileak eta hanturaren kontrako propietateak dituenez, orbanak eta zahartze-zantzuak txikiagotzen ditu eta orbanen itxura hobetzen du. Gainera, erradikal askeak neutralizatzen ditu eta larruazalaren elastizitatea hobetzen du. Larruazala garbitzeko, infusioa erabili dezakegu, edo olio sendagarria dilui-tuta. Kasu horretan, oregano-olioa olio eramailetan diluitu behar da 1:3 proportzioan.
Kontraindikazioak
Ez da gomendagarria kantitate handiak edatea, eta kontu handiz ibili behar da esentzia-olioarekin. Haurdun edo titia ematen dabiltzanek neurriz hartu behar dute oreganoa, eta esentzia-olioa ez erabili.
Landareak batzeko aholkuak
Orokorrean: hartu ondo ezagutzen duzuna; hartu neurriz eta soilik lekuan asko badaude; ez eraman dena, utzi beti zerbait; hartu bakarrik erabiliko duzun landarearen zatia; ez atera sustraitik, moztu ondo hazten jarrai daitezen; ez moztu loreen % 20 baino gehiago, zuhaitzak edo zuhaixkak badira; hartu bakarrik erabiliko duzuna, geroago itzuli ahal zara, edo beste leku batzuetara joan; ez jaso gune babestuetan edo parke naturaletan.
Non: larreetan eta autorik pasatzen ez den bide-ertzetan; goldatu gabeko basoetan; toxikorik erabiltzen ez den ortuetan eta lorategietan; INOIZ EZ areketan, fumigatutako landetan eta ibaiertz kutsatuetan.
Noiz: goizean, ihintza sikatu ondoren; hartu hostoak erabiliko ditugun egunean bertan; hartu loreak goizean eta sustraiak arratsaldean; landareak gorde edo sikatzeko, hobe da ilbehera denean jasotzea.
Materialak: eskularruak, artaziak, paperezko oihalezko poltsa, zumezko saskiak…