Silybum marianum. Mediterraneoko herrialdeetako eta Asiako landarea da eta grekoen eta erromatarren garaitik erabiltzen da. Gaur egun, planetako alde gehienetan dago eta itsas mailatik 1.300 metroko altuerara arte topatu daiteke. Batez ere Europako hegoaldean hazten da, lugorrietan, errepide ertzetan edo eremu epeletako zelaietan. Bi urtez behingo landare belarkara da, eta bi metroko altuera ere izan dezake. Hosto handiak ditu, berde distiratsu kolorekoak eta orban zuriak dituztenak. Hostoak hori koloreko arantza finetan amaitzen dira, eta iletxoak dituzte beheko aldean. Purpura koloreko loreak ditu, eta udan loratzen da, ekaina eta abuztua bitartean.