LAB sindikatuak esan duenez, enpresak 258 milioi euroko irabazi garbia izan zuen 2018an, eta 212 milioi eurokoa, 2019an. Gainera, dirulaguntza publikoak jasotzen ditu, eta “Euskal Herrian egindako aberastasuna munduan lanpostu prekarioak sortzeko erabili du”. Beraz, “ezin du hau bezalako erabakiak egun batetik bestera hartu”. Halaber, erakunde publikoei leporatu die emandako dirulaguntzak ez kontrolatzea. Horren harira hain zuzen ere galdetu diote gaur goizean Iñigo Urkullu lehendakariari Euskadi Irratiko Faktoria saioan. Izan ere, Eusko Jaurlaritzak eta GESTAMek hitzarmena sinatu dute aurten auto elektrikoaren inguruko ikerketa-zentroa egiteko. Hitzarmenari esker, taldeak zortzi milioi euroko dirulaguntza jasoko luke. Urkulluk erantzun du Gestampekin hitz egingo duela, “ez baita zilegi diru publikoa jasotzen duen enpresa batek kaleratzeak besterik gabe iragartzea”.
Beste aldetik, ELA sindikatuak adierazi du GESTAMP burtsan kotizatzen duen enpresa-taldea dela eta azken urteotan etekin aberatsak izan dituela. “Akziodunek milioika euro banatu dituzte dibidenduetan. Orain, krisi sanitarioaren egoera aprobetxatuz, munduan 112 lantegi dituen euskal multinazionalak bi lantegi horiek itxi nahi ditu Euskal Herrian, eta 200 langile baino gehiago kaleratu. ELAk GESTAMPen jarrera arbuiatzen du, eta argi diogu lanpostu guztiak eta planten etorkizuna defendatzeko borroka egingo dugula. Argi daukagu eraso honi gogor erantzutea tokatuko zaigula. Borroka da bidea”.
Salatu dutenez, GESTAMP euskal langileak mespretxatzen dituen beste industria-enpresa handi bat da. “Bere interesa akziodunen etekinak maximizatzea da, ehunka familiaren sufrimenduaren kontura”. Sindikatuak Eusko Jaurlaritzaren Industria Saila interpelatu du beste albo batera begiratu ez dezan eta lantegiak ixtea eta langileak kaleratzea eragotzi ditzan.