Sukaldean
Hainbat plater prestatzeko erabili dezakegu. Gordin ere erabili dezakegu entsaladetan, zopetan, eltzekoetan eta ozpinetakoetan; adibidez, chucrut-a da era naturalean ontzen den aza eta ohikoa da Alemanian eta inguruko herrialdeetan. Gaixorik gaudenean hartzea gomendagarria da, edo anemiarik edo min neuralgikorik badugu. Hobe da gordin hartzea, bere ezaugarriei eusteko; hala ere, aza egosia ere ona da digestiorako eta organismo osoan du eragina.
Propietate sendagarriak
–Digestioa hobetzeko, egunero hartu behar da edalontzi bat aza-ur.
–Gastritisa eta urdaileko ultzerak arintzeko, eta sintomak ditugula, aza egosi, eta egunero hiru aldiz har dezakegu katilukada bat salda. Era berean, edalontzi bat edo bi aza-ur har dezakegu.
–Erreduretan aza-zapia ipini dezakegu, haiek arintzeko.
–Bronkitisik, marrantarik edo eztulik badugu, edo ahotsa galdu edo anginak handituta baditugu, aza-jarabea hartu dezakegu: gehienez sei koilarakada handi egunero.
–Orbaintzailea da, eta bakterioen kontrakoa. Orokorrean, minak arintzeko erabili dezakegu, hala nola lunbagoa eta ziatika arintzeko. Beste aldetik, aza-kataplasma erabili dezakegu gaizkoatu diren zauriak sendotzeko.
Errezetak
–Ur egosia: Lapiko batean ipiniko dugu litro bat ur eta aza-hosto bat edo bi. Egosten denean, sua amatatuko dugu eta 10 minutuan izango dugu jalkitzen. Ez dugu sutan denbora luzean eduki behar, propietate asko galduko ditu eta.
–Ura: litro erdi uretan aza-hosto bat ipiniko dugu, eta likidotu; limoi-tanta batzuk gehituko ditugu.
–Xarabea: aza-hostoak zukutuko ditugu, oihal bat erabilita iragazi, eta azukrea edo eztia gehituko dugu (pisu bera). Egosi egingo dugu, eta hozten utzi. Botilatu egingo dugu.
–Zapia: aza-hostoak zuzenean ipiniko ditugu azalean, zaurian edo ultzeran.
–Kataplasma: aza-lore bati edo batzuei nerbio nagusia kenduko diegu, eta arrabol edo botila batek lagunduta zapalduko ditugu. Plantxarekin, esaterako, berotu ditzakegu. Minduta dugun gunean jarri dezakegu, eta apositu batez lotu. Erabili dezakegu giharretako minetarako, erreumarako, lunbagorako, gotarako, ziatikarako, kolpeetarako eta hesteetako edo gibeleko minetarako. Gaizkoatu diren zauriak osatzeko baliagarria da, ultzera barizedunak, hemorroideak, abzesuak, aknea eta ekzemak.
Ortuan
Hobe da oso lur ongarrituetan eta bustietan landatzea. Azak lurreko elikagai asko hartzen ditu eta horregatik da gomendagarria ortuan sarritan lekuz aldatzea. Era berean, kontu handiz ibili behar da izurriteekin, bereziki beldarrekin eta azaren herniarekin. Erabiltzen ez ditugun hostoak eta hondakinak baliatu ditzakegu untxiei, txerriei eta etxeko hegaztiei jaten emateko.
Bitxikeriak
Orain dela 4.000 urte baino gehiago hasi zen aza landatzen. Txinatarrek ikasi zuten azak gatzunetan kontserbatzen eta horrela elikatu ahal izan zituzten Txinako Hesi Handia egin zuten milaka langileak.
Kontraindikazioak
Ezin dute hartu hipotiroidismoa duten pertsonek, ezta odol-koagulazioa aldatzen duten botikak hartzen dituztenek ere.
Hartu ondo ezagutzen duzuna, neurriz eta soilik lekuan asko badaude. Utzi beti zerbait, eta ez atera landarea sustraitik. Ez moztu loreen % 20 baino gehiago, zuhaitzak edo zuhaixkak badira. Ez jaso gune babestuetan edo parke naturaletan. Hartu dezakezu larreetan eta autorik pasatzen ez den bide-ertzetan, goldatu gabeko basoetan, toxikorik erabiltzen ez den ortuetan eta lorategietan; INOIZ EZ batu areketan, fumigatutako landetan eta ibaiertz kutsatuetan. Hartu goizean. Erabili eskularruak…