Bihar hasiera emango zaio Laburbirari, euskarazko film laburren zirkuituari. Ekimena zortzigarren aldiz egin da aurten eta orotara 27 emanaldi eskainiko dira apirilaren 16ra arte: 26 emanaldi, Euskal Herriko herri eta hirietan; eta emanaldi bat, Londreseko Euskal Etxean.
Txorierrira apirilaren 14an ailegatuko da Laburbira, Tximintx Derioko euskara elkartearen eskutik. Gurea Aretoan film hauek ikusteko aukera izango dugu arratsaldeko 7etatik aurrera: Kepa Errastiren Maritxu; Asier Altunaren Artalde; Angel Aldarondoren Ondar ahoak; Jon Artolaren S@rtaldea; Saioaren Aizpuruaren Esku-titi; Aitor Artola, Irune Gurtubai eta Ibai Vigil-Escaleraren Blank postcards; Zapatilla films taldearen Biak bat; Trastaka taldearen Barrura begira; eta Kontraplano taldearen Nire bista faboritoa. Azken hiru filmak Kameratoia ikus-entzunezko rallyaren haritik sortutako lanak dira.
Laburbira Topagunea Euskara Elkarteen Federazioak, herriz herriko euskara elkarteekin lankidetzan, martxan jarritako ekimena da, eta helburu hauek ditu: euskarazko ikus-entzunezko urteko produkzioa ezagutaraztea eta herrietako kultur eskaintza aberastea. Gurean Korrika Kulturalaren egitarauaren barruan antolatu da.