Derioko nagusien egoera aztertu dute

Otsailean, Derioko Udalak adinekoentzako behatoki bat jarri zuen martxan, herriko nagusien premia sozialak antzemateko. Egitasmoaren bidez, 75 urtetik 98 urtera bitarteko 230 lagunen egoera aztertu egin da. Inkestatuen % 62 emakumezkoak dira; eta % 38, gizonezkoak. Ikerketa egiteko orduan, 75 urtetik gorako lagunak bizi diren etxebizitzak hartu dira kontuan; orotara 165 etxebizitza. Nagusi gehienak, % 54, ezkonduta daude eta % 40 alargunak dira; alargun gehienak emakumezkoak dira. Gainontzekoak ezkongabeak dira edo banatuta daude. Inkestatuen % 42 bakarrik bizi dira. Harreman sozialei dagokienez, ikerketan parte hartu duten lagun gehienek adierazi dute seme-alabekin, senideekin eta lagunekin harreman ona dutela. Hala ere, ia nagusien % 7k lagunik ez dutela esan dute, horiek hil direlako. Adinekoen % 96 sarritan ateratzen dira etxetik eta % 2k boluntario batek bisita jasotzen dute hamabost egunik behin. Bestalde, % 80k ez dute laguntzarik jasotzen etxeko gauzak egiteko, eta % 72k euren janaria prestatzen dute egunero. Era berean, % 70k ez dute laguntzarik erosketak egiteko orduan. Ikerketan batu diren datuen arabera, ia inkestatu guztiek dute itxura ona eta haien etxearen garbitasuna ere bada egokia. Nolanahi ere, etxebizitzen % 47ek mugikortasunari lotutako arazoak dituzte, igogailurik ez dutelako, edo bainugela ez dagoelako behar bezala egokituta. Nagusiek batez ere entzumen eta ikusmen arazoak dituzte, eta % 70ek ez du ibiltzeko laguntzarik behar. Inkestatuen % 7rengan gaitasun kognitiboaren arazoak antzeman dira. Adinekoen % 77k emozio-egoera normala badute ere, gainontzekoengan sentimendu hauek azaldu dira: bakartasuna, antsietatea, negarra eta beldurra. Azkenik, inkestatuen % 39k mendekotasun-egoera dute.