Lainomendi Derioko dantza taldeak 25 urte bete ditu aurten, eta horren haritik, egitarau oparoa prestatu dute asteburu honetarako. Bihar, apirilaren 18an, egun osoko jaia prestatu dute. Goizean, 11:00etan, jolasak egingo dituzte Sollube kalean, Derion, eta euria egiten badu, frontoian. Ostean, 13:00etan, trikipoteoa egingo dute eta gero, 14:30ean, herri-bazkaria, frontoian. Eguna borobiltzeko, Arizgoiti taldeak erromeria bat eskainiko du 18:00etatik aurrera. Igandea egun nagusia izango da, Lainomendik dantza agerraldia egingo baitu. Eskualdeko taldeak eta Errekaldeko Arraizpe taldea ere arituko dira bertan. Taldeek kalejira egingo dute 11:30etan, eta beranduago, 12:00etan, dantza erakustaldia ikusteko aukera egongo da eskolaren alboko aparkalekuan.
Informazio gehiago:
615 73 48 68