Goizeko 10:30etan umeen lasterketa egin zen, kilometro batekoa, Derioko kaleetatik. Beranduago, nagusien txanda izan zen, bai lasterketan, bai ibilaldian. Lasterketak bukatu zirenean, parte-hartzaileak txosna batean batu ziren taloa eta txorizoa jateko. “Datorren urtean eguraldia aurtengoa bezain txarra bada, salda eskainiko diegu korrikalariei”. Kantarelux musika taldeak hamaiketakoa girotu zien kirolariei eta lagunei.
Gure Señeak irabazteko asmorik gabeko elkartea 2010ean sortu zen, gaixotasun arraroak dituzten umeei eta haien familiei laguntza eta babesa emateko. Elkartetik adierazi duten moduan, gaur egun Derion badaude 11 familia elkarteari lotuta daudenak. Familia horien seme-alabek gaixotasun-espektro zabala dute, hala nola Esklerosi tuberkuluduna, Angelman sindromea, Proud Levine Carpenter sindromea, fibrosi kistikoa, garun-paralisia eta autismoa. Elkartea erreferente bihurtu da herrian, eta urtean zehar antolatzen dituzten kontzientziazio-ekintzen artean Kepa eta Arene anai-arreben oroimenezko lasterketa da azpimarratzekoa. Anai-arrebak gaixotasun arraro baten ondorioz hil ziren eta lasterketak umeak gogora ekartzea du helburu.