Autoa Derioko estanko baten kontra jo dute lapurtzen saiatzeko

Lapurrak Derioko Arteaga estankoa ebasten saiatu ziren zapatu goizean, 06:40ak inguruan. Horretarako, autoa bete-betean jo zuten estankoko pertsianaren kontra. “Auzokideek deitu ziguten eta berehala etorri ginen. Autoa estanko aurreko lorategian zegoen eta lapurrek alde eginda zeuden”, kontatu digute negozioaren jabeek. Pertsiana apurtu arren, ebasleak ezin izan ziren dendara sartu. “Ez zuten ezer eraman, izan ere, ez zuten barrura sartzeko zulorik edo tarterik egitea lortu”.

Estankoa zapatutik dute itxita eta espero dute, pertsiana berria gaur ipintzen badiete, bihar zabaldu ahal izatea. Bestetik, atea eta beste triskantza batzuk ere konpondu beharko dituzte, eta esan digute dena konpondu arte hilabete bi pasa daitezkeela. “Egia esan, atsekabetuta barik, amorratuta gaude, hainbat aldiz lapurtu digutelako. Hainbat aldiz, ezen ez baitakigu zenbat izan diren”.