Zorionak Gure Señeak elkarteari!

Gure Señeak irabazteko asmorik gabeko elkarteak 10 urte beti ditu aurten eta hori ospatzeko hainbat ekintza antolatu ditu. Lehenengoa otsailaren 19an egin zen Derioko Kultur Birikan. “Oso hunkigarria eta polita izan zen. Berrehun pertsona inguru batu ginen ekitaldian eta  izugarrizko giroa egon zen. Kultur Birika leporaino zegoen! Oso pozik gaude”, esan dute elkartekideek.

Gure Señeak elkarteaz gain, beste 33 erakundek osatzen dute Bizipoza elkartea, eta Derion egindako ekitaldian hari buruzko dokumentala estreinatu zen. Gainera, “Gure Señeak, 10 urte aukera baten bila” erakusketa ere ipini zen ikusgai. Erakusketa martxoaren 1era arte izango da. Ekitaldian parte hartu zuten lagunen artean hauek izan ziren: Esther Apraiz Derioko alkatea, Ortzi Garitano eta Aitor Arrizubieta Toko bertsolariak eta Gaizka Garitano eta Ane Azkona Athleticen kideak.

Gure Señeak urteurrena ospatzen jarraituko du datozen egunotan. Hilaren 23an, “Gure Señeak” Eguna egingo da eta horren barruan, Kepa eta Arene anai-arreben oroimenezko lasterketa. Eta martxoaren 1ean, Pirritx, Porrotx eta Marimotots pailazoek Bizi Dantza ikuskizuna eskainiko dute Derioko kiroldegian, 12:00etan, Lainomendi dantza taldearen laguntzarekin.