Horren harira, udalak lehenengo urratsa egin du eta Umeen Kontseilua eratu du. Kontseilua lehen hezkuntzako 4. eta 5. mailetako 19 umek eta udal-ordezkariek osatzen dute, herriko umeen eta udalaren arteko harremana hobetzeko asmoz. Lehen bilera otsailaren 28an egin zuten. Bileraren aurretik, Esther Apraiz Derioko alkatea umeen gurasoekin batu zen, eta egitasmoaren helburuak azaltzeaz gainera, kontseiluaren batzarretan aztertuko diren gaiak zehaztu zituzten. Horri lotuta, udalak gogora ekarri du dagoeneko kontseiluarekin Lagunekin eskolara proiektua jorratzen dabiltzala.
Umeen kontseilua hilabeterik behin bilduko da Larrabarri baserrian, eta beharrezkoa izanez gero, teknikariek eta politikariek ere hartuko dute parte bileretan.