“Iaz, kreditu-aldaketa egin genuen urte amaieran lanak esleitu ahal izateko, eta otsailean esleipenduna genuen jada, hau da, koronabirusak eragindako osasun-krisia hasi baino lehen”, esan du Esther Apraiz Derioko alkateak. “Proiektua derioztarren proposamena da, hainbat bidetatik behin eta berriz helarazi digutena. Pozik gaude herritarren eskaerari erantzuna emango diogulako eta aisialdirako gune berri bat eskainiko dugulako. Gune berria egungo igerilekuen osagarria izango da”.
Sakonerarik gabeko jolasgune berriak 85 metro karratu izango ditu, eta gune bitan banatuko da. Umeentzako gunean, hauek egongo dira: lurretik aterako diren ur-zurrustak, uretako arkuak eta jolasteko elementuak, hala nola karramarroak, itsas izarrak eta dortokak. Familientzako gunea, bestalde, familientzat eta gazteentzat izango da. Jolasa aktiboagoa izango da bertan, eta mugitzen diren eta ukitu daitezken elementuak ipiniko dira, esaterako, iraultzen diren kuboak.
Udalak jakinarazitakoaren arabera, ohiko igerilekuen aldean, azpiegitura berriak bermatuko du modu seguruan jolastu daitekeela. Horrela, bada, sakonerarik gabeko ur-instalazioa denez, edozein adin-tarteko herritarra arrisku barik jolastu ahalko da uretan. Gainera, hil beroetan, Derioko Udal Kiroldegiak uretan jolasteko berariazko gune bat eskaini ahalko du, adinagatik edo irisgarritasunari lotutako arrazoiengatik inor baztertu gabe.
Koronabirusaren gaineko datuak Txorierrin hemen.