“Funtsezko zerbitzua da guretzat, adinekoen ongizatea eta segurtasuna babesten eta hobetzen laguntzen digu eta”, adierazi du Esther Apraiz alkateak. “Haien beharrei adi gaude, eta zerbitzu hau talde zaurgarri baten arrisku-egoerak prebenitzeko inbertsioa da. Zoritxarrez, ustekabeko suteak edo istripuak nahiko ohikoak dira etxeetan, eta, horregatik, ke-detektagailuek bizitza salbatu diezaiekete”.
Ke-detektagailua ipintzeaz gainera, etxebizitza bakoitzean dauden arriskuak aztertu dira eta krokis bat egin da, larrialdirik izanez gero, ebakuazioa errazteko. Halaber, adinekoei eskuliburu bana eman zaie eta bertan segurtasuneko oinarrizko ezagutzak jaso dira. Bestalde, etxebizitzak aldizka ikuskatzen dira arriskuak kontrolatzeko. Ke-detektagailuak ere berraztertzen dira, bateriak ordezkatzen dira, pantaila optikoetako zirrikituak garbitzen dira eta gailuak testatzen dira, ondo funtzionatzen dutela egiaztatzeko. Doako zerbitzua da eta ke-detektagailuak jartzeko eta mantentzeko gastua udalak hartu du bere gain.