Montsek kontatu digunez, Alberto Gallego elkartearen kideak egitasmoan parte hartzeko proposamena egin zion. “Pandemiaren hasieran, herriko boluntarioen taldean ibili ginen osasun-langileentzako materiala josten. Albertok Zamudioko ospitalean egiten du lan eta lankide baten bidez izan zuen gure berri. Maskarak egitea proposatu zidan eta Lourdesekin eta Ascenekin ipini nintzen harremanetan”. Emakumeak denbora librean egiten dituzte maskarak eta dagoeneko 70 josi dituzte. “Helburua 150 maskara egitea da”, esan digu Gallegok. Maskara bakoitzak bost euro balio du eta elkartearen Instagramen bidez -@aj.hakunamatata- edo aj.hakunamatata@gmail.com helbide elektronikora idatzita lortu daitezke. Gallegok azaldu digunez, maskarak egiteko erabiltzen diren oihalak Bilboko merkatari senegaldar batzuei erosi dizkiete elkarteak zuen dirua erabilita.
Green String elkarteak egitasmo batzuk ditu Kenian; COVID-19aren aurka egiteko proiektu bat haien artean. Proiektuaren ardatzak dira, besteak beste, desinfektatze-lanak areagotzea, biztanleei maskarak ematea eta baldintzak hobetzea, jendea lanera joan ahal izateko.