Derioko Udalak bost euroko 5.500 bonu banatuko ditu, herrian kontsumitzea bultzatzeko

Derioko Udalak 27.500 euro bideratuko ditu “Derio Martxan” bonu-kanpainara, tokiko merkataritza, ostalaritza eta enpresak sustatzeko. Jakinarazi dutenez, hurrengo egunetan, udal-langileak etxez etxe joango dira 18 urtetik gorako derioztarrei gutun bana ematera. Horretan, kanpaina azaltzeaz gainera, bost euroko bonua egongo da eta kanpainarekin bat egin duten saltokietan (36 orotara) gastatu ahalko da urtarrilaren 5a baino lehen. Herritarrek gehienez bonu bi erabilik ahalko dituzte erosketa bat egiteko.

“Kanpaina honen bitartez, udalerriko negozioekin dugun konpromisoa berretsi nahi dugu, eta, aldi berean, herritarrei tokiko saltokietan erostearen garrantzia ikusaraztea”, azaldu du Esther Apraiz Derioko alkateak. “Egoera delikatua da oso. Orain, inoiz baino gehiago, tokiko komertzioa eta ostalaritza bultzatu behar ditugu. Gabonetako erosketak egiteko deskontua izateaz gainera, gutako bakoitzak bere aletxoa jarriko du, herria hainbeste girotzen duten sektore horiei laguntzeko. Herriko establezimenduek kalitatea, tratu pertsonalizatua eta profesionaltasuna eskaintzen dituzte”.

Kanpainaren oinarriak eta berarekin bat egin duten saltokien zerrenda www.deriokoudala.net webgunean kontsultatu daitezke. Bestalde, saltokietan “Derio Martxan” kanpainaren logotipoa ipiniko da ikusgai.

Txorierriko albiste garrantzitsuak eta azken ordukoak jaso gura dituzu Whatsapp bitartez?

WHATSAPP: Bidali ALTA hitza 747 406 561 telefono zenbakira.

Izan zaitez berriemale ere. Bidali zure argazkiak, bideoak eta berriak.

Hilero lagun birentzako bazkaria zozkatuko dugu alta hartzen dutenen artean (Baserri Antzokian).