Bizkaiko Elikagaien Bankuak janaria batzeko kanpaina egingo du maiatzaren 7an eta 8an, eta Derioko Elikagaien Elkarte Solidarioak (DEES) bat egin du ekimenarekin. Hortaz, barikuan eta zapatuan, elkarteko boluntarioak BM supermerkatuan izango dira 09:00etatik 21:00ak arte. Iaz bezala, COVID-19a dela eta, “elikagai-bonua” erabiliko da, boluntarioei elikagaiak poltsetan eman beharrean.
Horrela, bezeroek kutxan bertan erosi ahalko dute bonua, nahi duten zenbatekoa ordainduta. Bonuak supermerkatuak gordeko ditu eta Bizkaiko Elikagaien Bankuak urtean erabili ahalko ditu elikagaiak erosteko. Elikagaiak Bizkaian banatuko ditu udalerri bakoitzaren beharrizanen arabera. Derioko Udalak kanpainan parte hartzeko deia egin die herritarrei. Gogora ekarri duenez, Derion tona bat elikagai inguru banatzen da eta 50 familiak baino gehiagok jasotzen dute Bizkaiko herritarren elkartasuna.
Bestalde, supermerkatura hurbildu ezin direnek ere diru-ekarpena egin ahalko dute hurrengo bide hauetako bat erabilita: Bizum, kreditu-txartela, kontu korrontea eta Paypal. Informazio gehiago hemen.
Txorierriko albiste garrantzitsuak eta azken ordukoak jaso gura dituzu Whatsapp bitartez?
WHATSAPP: Bidali ALTA hitza 747 406 561 telefono zenbakira.
Izan zaitez berriemale ere. Bidali zure argazkiak, bideoak eta berriak.
Hilero lagun birentzako bazkaria zozkatuko dugu alta hartzen dutenen artean (Baserri Antzokian).
