Udalaren hitzetan, tasetan aldaketa egin daiteke “oraindik ez baitira kobratu eremu publikoan mahaiak eta aulkiak ipintzeari dagozkion 2020ko eta 2021eko tasak”. Gainera, udalak esan du neurriak aurrekontu-egonkortasunaren printzipio betetzen duela eta erakundeak finantzazio-ahalmena duela ezohiko hobaria ezartzeko. Orotara 6.276 euroko hobaria izango da eta, “beraz, neurriak ez luke aurrekontuen egonkortasunean eta iraunkortasunean eraginik izango”. Bestalde, udalak gogora ekarri du iaz, lehenengo alarma-egoeraren ondoren, “negozioak berriz ireki zituztenean, ezarritako edukiera-murrizketak kontuan hartuta, bide publikoan leku handiagoa utzi zitzaiela terrazak handitzeko, aukerak banan-banan aztertu ondoren eta negozio bakoitzaren ezaugarriak eta kokapena kontuan hartuta”.
Esther Apraiz Derioko alkateak zera adierazi du: “Pandemiak sektore ekonomiko guztiak astindu ditu, familia guztiak, era batera edo bestera, eta lehen minututik, gure asmoa guztien ondoan egotea da, inpaktu hori minimizatzeko”. Horri lotuta, aurreratu du kontsumo-bonuen kanpaina berri bat abian jartzeko aukera aztertzen dabiltzala, eta zuzeneko laguntzak uda osterako.
Maiatzean, autonomoentzako eta tokiko merkatarientzako eta ostalarientzako zuzeneko hirugarren laguntza-sorta aktibatu du eta orotara 36.000 euroko laguntza eman du. Udalak esandakoaren arabera, pandemia hasi zenetik 155.000 euro baino gehiago eman ditu laguntzetan.