Kiroldegiaren instalazio termikoari dagokionez, kiroldegiko eta igerilekuko aldageletako klimatizagailu biak aldatuko dira, eta igerilekuan ere ipiniko da klimatizagailu berriak. Azken horren harira, azaldu dute “ekipamendu berriari esker, kondentsazio-arazoak konponduko” direla eta “hondar-energia hobeto aprobetxatuko” dela. Bestalde, beroa berriro berreskuratzea ahalbidetzen duen airea berritzeko sistema ipiniko da muskulazio-gelan, eta ekipo berriak gimnasioan, hotzari eta beroari lotutako eskaerei erantzuna emateko.
Udal-aldizkarian jaso dute Esther Apraiz alkatearen hitzak: “Diseinu aurreratua eta goi-errendimendua dituzten ekipoak dira eta haiei esker asko hobetuko da hainbat gunetako klimatizazioaren eraginkortasuna, eta energia aurreratu. Era berean, gaur egungo arauekin bat egingo dugu eta lortuko da airearen kalitatea egokia izatea. Hortaz, konfort-parametroak hobetuko dira, eta funtzionamendu-etenaldiak gutxitu”.
Beste aldetik, igerilekuko eta gimnasioko estalkiak ere konponduko ditu udalak. Gaur egungo estalkien gainean, xafla lakatu bat ipiniko da, eta kondentsazioa ekiditen duen isolamendua. Halaber, junturak errematatuko dira, eta urak behar bezala husteko lanak egin.