Gorpuzkiak Jesus Izagirre Gabiriako gudarienak izan daitezkeela uste dute haren senideek. Izagirre Amaiur batailoiko sarjentua zen eta 1937ko maiatzean hil zuten Bizkargi mendian. Familiak Iñigo Santxo abokatuaren lanari esker jakin izan du Izagirreren hezurrak Derioko hilerriko panteoi batean egon zitezkeela. Hezurrak Aranzadi elkarteko hiru kidek, Paco Etxebarria haien artean, atera eta sailkatu zituzten, eta probak egin beharko dira egiaztatzeko Izagirrerenak diren.
Antza denez, Izagirre eta berarekin batera hil zituzten beste gudari batzuk Derioko hilerrian lurperatu zituzten, eta handik 15 urtera hezurtegi orokorrera bota. Baina, Santxoren ikerketa-lanari esker, familiak jakin izan du Izagirreren hezurrak lehenago sartu zirela Aspiuntza Bilboko familiaren panteoian. Azaldu den moduan, harremana zegoen familia bien artean eta Aspiuntza sendiak baimena eman du hilobia irekitzeko. Hura atzo zabaldu zen eta hilerrian batu ziren, besteak beste, Izagirreren senideak, Iñigo Gaztelu Larrabetzuko alkatea eta Derioko ordezkariak. Aspiuntza familiako panteoian 19 lagun zeuden lurperatuta eta Aranzadiko kideek haietako hiruren gorpuzkiak hartu dituzte egiaztatzeko Izagirrerenak diren.
Txorierriko albiste garrantzitsuak eta azken ordukoak jaso gura dituzu Whatsapp bitartez?
WHATSAPP: Bidali ALTA hitza 747 406 561 telefono zenbakira.
Izan zaitez berriemale ere. Bidali zure argazkiak, bideoak eta berriak.
Hilero lagun birentzako bazkaria zozkatuko dugu alta hartzen dutenen artean (Baserri Antzokian).
