Diskoa, kulunka eta stepa dituen multzoa azpimarratu daiteke makina berrien artean. Multzo hori egokia da oreka hobetzeko eta beheko gorputz-atalak lantzeko. Era berean, sorbalda lantzeko behatz-eskailera txiki bat dago zirkuituan, eta eskumuturra eta besaurrea lantzeko malguki bat.
Udalak nagusientzako ariketa fisikoen tailerra antolatu du urriaren 27rako. Tailer horren baitan, gimnasia-guneko makinak nola erabili azalduko da nagusien autonomia hobetzeko. Bestalde, gogora ekarri dute urriaren 20an nagusientzako hitzaldia egingo dela eta horretan mugikorraren erabilera, gizarte-sareak eta argazki-aplikazioak jorratuko direla. Tailerretan parte hartzeko, izena eman behar da Kultur Birikan edo 944 659 714 telefono-zenbakira deituta.
Calistenia-gunea
Joan den astean, calistenia-guneko lurzorua berritzeko lanak amaitu ziren. Eremuak 84 metro koadroko azalera du eta lanetan 6.606 euro ipini ditu udalak. Batez ere gazteentzako gunea da eta hainbat altueratako arkuek, barra sinpleek eta barra paraleloek osatuta dago, erabiltzaileek indarra eta ahalmen kardiobaskularra landu ditzaten.