Lehen urratsak egin ditu Derioko Marikobaso Espazioak, eta, proiektuaren aurkezpenean ikusi zenez, herritarren babesa jaso du. “Nahiko lagun batu ginen bertan, nagusiak, helduak, gazteak zein umeak, eta pozgarria izan zen, gure asmoa baita gune hau adin guztietara zabaltzea. Era berean, guk ez ezik gainerakoek ere gune hau beharrezkotzat jotzeak adierazten du badugula zer egin. Aurrera jarraitzeko beste indar hartu dugu”, esan digute kideek.
Babesa ekonomikoa ere jaso dute. Horrela, egitasmoa finantzatzen laguntzeko crowdfunding- kanpaina egin dute eta gutxieneko diru-kopurua gainditu dute. Orotara 4.684 euro batu dituzte. Marikobaso Espazioa Derioko hainbat elkarte eta pertsona auzolanean egiten dabiltzan proiektua da eta lau zutabe nagusi ditu: kultura, euskara, feminismoa eta ekologia.