2020ko udan aurkeztutako dokumentuan 85 jarduera jaso zituen udalak, hiru eremu nagusitan antolatuta: Herritarrak, Antolaketa eta Lurraldea. Esther Apraiz Derioko alkateak gogora ekarri du pandemiaren eraginez Kudeaketa Plana herritarren beharrizan berrietara egokitu behar izan zela. “Pandemiaren ondorioei aurre egin behar izan genien eta gogor lan egin behar izan genuen herritarren ongizatea eta bizi-kalitatea bermatzeko”. Horri dagokionez, udal-langileen lana eta konpromisoa eskertu du, “planean jasotako ekintza asko errealitate bihurtzea ahalbidetu baitute”.
Lan horren emaitza da Derioko Kudeaketa Plana. Gainera, plan horretan batzen dira azken bi urteetako partaidetza-prozesuetan herritarrek egindako ekarpenak. “Beraz, hiru eragileren artean osatu da dokumentua: ordezkari politikoak, uda-langileak eta derioztarrak. Dokumentu horretan etorkizunari begira Deriok dituen erronka nagusiak batu dira. Erronka horiei ekintza eta proiektu zehatzen bidez ematen ari gatzaizkie erantzuna. Bestalde, azken urtean ahaleginetan ibili gara Kudeaketa Plana 2030 Agendako Garapen Iraunkorreko Helburuekin lotzeko”.
Udalak azaldutakoaren arabera, aurrerapen handiena Antolaketa atalean izan da, “planean jasotako 16 jarduera ildoen % 86 bete da eta”. Besteak beste, honako hauek nabarmentzen dira bertan: udal-antolaketa hiru esparrutan ezartzea, zeharkakotasuna optimizatzeko eta tokiko administrazioaren funtzionamendua arintzeko; sistema berria ezartzea etengabeko ebaluazioari begira eta kontuak emateko; eta COVID-19ak eragindako krisiari aurre egiteko, planak, aurrekontuak eta neurriak egokitzea.
Herritarrak atalak 28 ekintza zehatz batzen ditu, eta, jakinarazi moduan, ekintzen % 74 egin dira, hala nola dirulaguntzak izapidetzeko prestakuntza eta laguntza ematea, hirugarren adinekoentzako programa/ludoteka abian jartzea eta Umeen Kontseilua sortzea. Azkenik, Lurraldea ataleko 41 ekintzen % 64 bete dira: esaterako, Nagusien Etxea oso-osorik berritzea, Gazianeko skate parkea, Uribe eta Ganbe kaleetan trafikoa lasaitzea eta irisgarritasun-plana eguneratzea.