Txorierriko Baserri Antzokia duela sei urte jaio zen euskaltzaleen topagune bihurtzeko eta bailaran euskara sustatzeko. Urrian urteurrena ospatu dute eta, horretarako, esker ona erakutsi diete euskara eta euskal kultura bultzatzeko zenbait eragilek egindako lanari. Elkarte hauek jaso zuten omenaldia: Larrabetzuko Hori Bai gaztetxea, Lezamako Pilota Kluba, Zamudioko Hiru-Bat dantza taldea, Txorierriko Zerbitzuen Mankomunitatea, Laurotako jai batzordea eta Taberna Ibiltaria musika taldea.
Jaia barikuan egin zuten. Sarituez gainera, hainbat lagun eta Baserri Antzokiaren bazkide batu ziren bertan. Elkarteek eskuz eta egurrez egindako trikuharria jaso zuten. “Eskertzeko modukoa da. Hori Bai gaztetxeak hainbat urte daramatza autogestioaren bidezko eskaintza euskaraz sustatzen, eta pozgarria da guretzat lan hori aintzat hartzea”, esan dute Hori Baikoek. Sari-banaketaren ostean, kopaua eman zieten gonbidatuei eta Taberna Ibiltaria taldeak ekitaldia girotu zuen.
