Joanes Camara da Emaus Fundazioko gizarteratze-teknikaria. Azaldu digunez, herriko gazte bat, Alazne Prieto, hasi zen ekimena antolatzen duela hiruzpalau urte. “Lagunek laguntzen zioten. Bestalde, Emaus Fundazioko kideok iaz hartu genuen lehen aldiz parte proiektuan, eta aurten Apnabi elkarteak egin du egitasmoarekin bat”. Jostailuak Derioko Udalak Kultur Birikan utzitako lokalean batu dituzte. “Jostailu asko batu diren arren, aipatu beharra dago iazko bilketa askoz arrakastatsuagoa izan zela. Aurten jostailu gutxiago ekarri dira; hala ere, denetarik dago: baloiak, puzzleak, panpinak, bizikletak… Gehienak umeentzako jostailuak dira, baina gaztetxoentzat ere badaude”. Jostailu batzuk egoera onean daude; beste batzuei, berriz, aleren bat falta zaie edo ez daude hain egoera onean. “Guk jostailuak sailkatzen ditugu: ea apurtuta dauden, zerbait falta zaien… Gaika ere sailkatzen ditugu”.
Beharrizana duena abenduaren 23ra arte hurbildu daiteke Kultur Birikara. “Edozein herritako pertsonak hurbildu daitezke. Iaz, esaterako, Bilboko lagun batzuk ere etorri ziren. Jostailuak jasotzeko aldia gaindituta jostailurik egonez gero, Afrikara bidaliko ditugu: Togora, Novisi elkartearen bidez, eta Ghanara”.