San Isidro jai-batzordearen esanetan, lanean ibili dira “jai parekideak, askotarikoak eta partaidetzazkoak sortzeko”. “Gure helburua bete dadin, bereziki nabarmentzen dugu ez dugula propaganda politikorik onartuko, ez sare sozialen bidez, ez panfletoak edo alderdi politikoen siglak biltzen dituen edozein objektu banatuz. Ezta ekitaldi politikorik ere”, esan dute gizarte-sareetan.
Txosnagunea lekuz aldatuta
Beste aldetik, jai-batzordeak iragarri du txosnak beste leku batean ipiniko direla aurten, frontoi ondoko kantxa estalian hain zuzen. “Erabakiak ez du jai-batzordearekin zerikusirik izan”, argitu dute.
Eraso sexistarik ez
Azkenik, beste helburu bat da jaigunea leku segurua izan dadila. Hortaz, eraso matxista ikusi edo jasaten duenak Koxak Derioko elkarte feministaren telefono-zenbakira deitu dezake, edo whatsappa bidali. Telefono-zenbakia hau da: 631 849 666. Era berean, txosnara jo daiteke.