"Azken urteotan klubaren mentalitatea desberdina da. Igotzeko presiorik ez dugu, baina mailari eustea baino zerbait gehiago lortu nahi dugu. Eta horretarako egiten dugu lan. Aurten, azkenean igo gara, hasiera kaskarra eta entrenatzaile berria eta gaztea izan arren", azaldu du Javi Rodriguez presidenteak. Bere esanetan, igoeraren gakoa taldearen giro ederra izan da. "Familia bat izan gara. Urteak eta urteak daramatzat futbolean, baina aurten Deriok izan duen giroa ez dut gainerako taldeetan inoiz ikusi". Gainera, talderik indartsuena izan da defentsan. “Hainbat partidatan ez dugu golik jaso. Maila honetan funtsezkoa da akatsik ez egitea eta arerioenak aprobetxatzea".
Rodriguezek urte bi daramatza presidente. Bere eskutik, orain dela urte bi Derion sakabanatuta zeuden hiru taldeak –gizonezkoa, emakumezkoa eta Arteaga (eskola-kirola)– batu ziren klub berean, CD Derion. Batzordekideek kluba kudeatzen dute, baina kirol arloa Iñigo Muruaren Dimension Football enpresaren eskuetan utzi dute, eta euren hitzetan, emaitzak lortzen dabiltza. "Gazte eta kadete mailako taldeak ere igo dira Lehentasunezko mailara, lehendabiziko aldiz".
Hiru talde batera dabiltzanetik, zaletuak ere batera joaten dira eta Derio urdin-gorria da. "Normalean 400-500 lagun batzen ditugu astebururo partidak ikusten. Igoera eguna ere berezia izan zen, zelaia jendez gainezka zegoelako. Ez dakit zenbat lagun sartu ziren. Batzuek diote mila lagun egon ginela. Harmailetan 400-500 lagun egon daitezke eta leporaino zegoen, eta zelai inguruan ere ez zegoen zaletu gehiagorik hartzeko lekurik. Zelaia ez dut inoiz horrela ikusi".
"Jokalari batzuek nahiago izan dute CD Derion jokatu, nahiz eta diru gutxiago kobratu"
Igoerak ez ditu ustekabez batzarkideak harrapatu, baina lehia bizia izan da. "Taldea ahalik eta indartsuenen osatzen saiatzen gara urtero, baina arerioek guk baino diru gehiago dute: Santurtzi, Balmaseda, Zalla... Zorionez, dirua ez da ahalguztiduna, eta jokalari batzuek nahiago izan dute Derion jokatu, nahiz eta diru gutxiago kobratu. Eta horren meritua Muruarena da, lehengo taldearen kirol-zuzendariarena, horrelako jokalariak Deriora ekartzeagatik. Guk jokalariak maite ditugu eta ahalik eta ondoen tratatzen saiatzen gara. Soldatetan eskaintzen ez duguna klubaren azpiegiturak indartzera bideratzen dugu: fisioterapeutak eta gimnasioa, adibidez. Ez dira gauza handiak, baina jokalariak eroso daude".
Deusto, Portugalete, Baskonia...
Nahiz eta 3. RFEF Estatu mailako kategoria izan, datorren urtean, CD Deriok bakarrik talde euskaldunen kontra jokatuko du. Gehienak bizkaitarrak izango dira –Portugalete, Baskonia, Deusto, Leioa...–, baina giputzak –Anaitasuna, Pasaia– eta arabarrak –Vitoria– ere izango dituzte aurrean. "Igoera lorpen handia da klubarentzat, ez garelako inoiz hain kategoria altuan ibili. Eta Derioko zaletuek poz handia hartuko dute, datorren urtean talde handiak Ibaiondo zelaira etorriko direlako: Portu, Baskonia, Leioa, Durangoko Culturala...".
Helburua, beraz, mailari eustea izango da. Edo ez? "Muturra sartu dugu 3. RFEF kategorian eta bertan gelditzea izango dugu helburu. Eta handik aurrera, ikusiko dugu; ea apurka-apurka hazi ahal garen. Zamudiok urte bi eman zituen Bigarren B Mailan, txalo bero bat haiei. Hala ere, ez da gure helburua, Zamudiok aurrekontu handiagoa duelako. Aurten, talde bi gehiago egongo dira 3. RFEF kategorian, liga zabaldu dutelako, eta horrek erraztu ahal du gure helburua".
Kategoria berriak eskakizun berezi batzuk izango ditu. Kirol arloan, jokalari berriak etorriko dira CD Deriora, baina presidenteak erdia mantentzea espero du. Era berean, datorren denboraldia garestiagoa izango da. "Epaileen kostua bikoiztuko da, eta fitxak eta zigorrak ere garestiagoak izango dira. Lanean gabiltza, baina oraindik ez dakigu zer egingo dugun. Espainiako Federazioak dirulaguntza ematen du eta hitz egin behar dugu Derioko Udalarekin eta Athleticekin. Talde zuri-gorriarekin hitzarmena dugu. Espero dut herriak babesa ematen jarraitzea. Dirua lortu behar da, baina betikoei gehiago eskatu barik".
400 jokalari
CD Derio 1977an sortu zen. Gaur egun, 24 taldek eta 400 jokalarik osatzen dute kluba. Lehenengo taldea gaztea da, baina gehienak ez dira herrikoak. "Oso zaila da bakarrik derioztarrekin maila honetan lehian sartzea. Klub guztioi gertatzen zaigu. Batzuetan sei derioztar ibili dira lehenengo taldean, baina zaila da. Beheko kategorietan, aldiz, gehienak derioztarrak dira". Derio "pausoz pauso" doa aurrera, eta "ahalik eta profesionalen izaten" saiatzen da. Ez dute bere neurria zein den ahaztuko, baina hori zelaiak adieraziko du eta datorren urtean 3. RFEF mailakoak izango dira.