Pumptrack-a adin guztietako erabiltzaileek disfrutatzeko diseinatu da, zailtasun-maila ertainekoa da eta. Pistak 1.300 metro karratuko eremua du; eta zirkuituak, bi metroko zabalerako bi ibilbide: bata 105 metroko ibilbide nagusia da, eta bestea, 55 metrokoa. Ibilbideetan guztira 30 oztopo eta arrapala atondu dira, hainbat salto-mota egiteko eta erabiltzaileen trebetasuna probatzeko. Bestalde, zirkuitua diseinatu da bira oso bat pedalei eragin gabe edo oinez bultzatu barik egin ahal izateko. Halaber, aldi berean 16 erabiltzaile ibili ahalko dira pistan.
“Oso pozik gaude pumptrack-a jada errealitate delako”, adierazi du Esther Apraiz Derioko alkateak. “Azpiegitura berriak derioztarrek eskatutakoari erantzuten dio, eta gero eta jarraitzaile eta erabiltzaile gehiago dituzten hainbat modalitate praktikatzeko aukera emango du, hala nola skatea edo mendiko bizikleta. Apraizek azpimarratu duenez, “udala herriko gazteentzako programak, zerbitzuak eta instalazioak hobetzeko egiten dabilen apustuaren adibideetako bat da pista berria”.