Marikobaso espazioak egonaldi artistikoak antolatzeko asmoa du Derion, eta deialdia zabaldu du horretarako. Egitasmoaren bidez, egoitzaren erabilera utziko diote sortzaile bati edo kolektibo txiki bati (gehienez bost lagunek osatutakoa). 2023-2024 aldirako deialdia da, printzipioz sei hilabetekoa. “Edozein diziplina artistiko onartzen dugu, baldin eta izpiritu kritikoarekin eta eraldatzailearekin bada. Proiektuen artean ebazteko, kontuan hartuko dira Marikobasoren lau oinarri nagusiak: feminismoa, euskara, kultura eta ekologismoa”.
Azaldu dutenez, Marikobasok hauek eskainiko ditu: egoitza bera (50 metro koadro eta hiru gela), egoitzako tresneria erabiltzea (lan-mahaiak, ordenagailua, aulkiak, telebista…) eta egoitzarako sarbide librea, lekuaren ohiko funtzionamenduarekin koordinatuta. Horren truke, CC-BY-SA lizentziapean sortu beharko da materiala, eta, diziplinaren arabera, Marikobason hari lotutako ekintza egitea: tailerra, emanaldia, horma-irudia margotzea…
Deialdia urriaren 1etik 15era arte egongo da irekita. Parte hartzeko edo informazio gehiago eskuratzeko, marikobaso.martxan@gmail.com helbide elektronikora idatzi behar da. Bestalde, deialdiaren oinarriak hemen kontsultatu daitezke.
Txorierriko albiste garrantzitsuak eta azken ordukoak jaso gura dituzu Whatsapp bitartez?
WHATSAPP: Bidali ALTA hitza 747 406 561 telefono zenbakira.
Izan zaitez berriemale ere. Bidali zure argazkiak, bideoak eta berriak.
Hilero lagun birentzako bazkaria zozkatuko dugu alta hartzen dutenen artean (Baserri Antzokian).
