Azaldu dutenez, hauek dira betetzeko eskatzen duten oinarrizko lan-baldintzak: kasuak taldeka batzea, lan-arropa zerbitzua ematen den landa-ingurunera egokitzea, erabiltzaileen txostenak eguneratzea, ordu erdiko lan-zerbitzuak kendu eta ordubeteko lan-zerbitzu bihurtzea, langile guztiek udalerri guztietan aparkatzeko txartelak izatea, senideei eta zaintzaileei atsedena hartzeko orduak eskaintzea eta langileek euren autoa erabili behar izateari irtenbidea ematea. “Langileon lan-baldintza penagarriak gogor salatzeaz gainera, Mankomunitatearen jarrera ere azpimarratu nahi dugu. Izan ere, egoera honen aurrean beste alde batera begiratzea ere egoeraren arduraduna izatea da. Langileon aldarriei berehalako konponbidea ematea exijitzen dugu”. Bestalde, esan duten moduan, “egoerak langileen lan- eta bizi-baldintzetan ez ezik zerbitzuaren kalitatean eta erabiltzaileengan ere eragina du”.
SADeko langileak duela urtebete hasi ziren mobilizatzen euren lan-baldintzak salatzeko eta horiek hobetzeko borrokatzeko.