Dena errespetagarria al da? Iritzi guztiak onargarriak al dira? Ez daude mugarik? Hamaika adibide bururatzen zaizkit: duela egun batzuk Madrilgo alkateak lotsarik gabe defendatu zuenean Gazan gertatzen ari dena ez dela genozidioa (65.000 pertsona baino gehiago eraili dituzte); Mariló Montero kazetariak prime time-ean esan zuenean tauromakia arte bat dela eta zezenari ez zaiola tratu txarrik ematen; edo ultraeskuinaren edozein diskurtso indarkeria matxistaren existentzia ezaren inguruan (1.300 emakume eraili dituzte 2003tik) edo LGTBIQ+ kolektiboaren doktrinamenduaren inguruan edo delinkuentziaren gorakadaren inguruan etorkinen iritsiera handiarengatik (GEZURRA, 2005ean genituen etorkinen bikoitza dugu eta delinkuentzia tasa baxuagoa). “Beno, nire iritzia da” diote askok. Bai, baina gorrotoak eta gezurrek elikatutako iritzia da. Zer da txarto egiten ari garena? Zerk egiten du huts? Egia al da gizarte geroz eta ezjakinagoa garela? Argi dudana da ezin dudala eta ez ditudala iritzi guztiak errespetatu behar. Intolerantea izango al naiz?
Ohitura da, gustuko dut eta osasuntsua iruditzen zait, lagunak batzen garen bakoitzean debateak sortzea. Egunean zehar gertatu izan denarengatik, irakurri dugun albisteren batengatik, politikari batek esan duenarengatik… Eta eztabaida bero horietako batean (beti izan ohi dira) lagun batek esan zidan: “Baina errespetatu behar duzu”. Logikoki ez geunden ados hitz egiten ari ginen gaian, migrazioari buruzkoa zen. Eta atentzioa ematen dit ez delako lau hitz horiek esaten didan lehen pertsona azkenaldian.