Nere aitaren etxea

Erabiltzailearen aurpegia Iñaki Eguskizaga, abokatu erretiratua 2024ko eka. 26a, 13:58

Nasser bere lurrari begiratzen egoan pentsakor. Jada prestatzen hasi behar zan, ereiteko sasoia hurbiltzen zalako. Bere emaztearen, Habiba, eta Hakim (5 urte) eta Aysha (2 urte) seme-alaben ostean lur hori zan berarentzat altxorrik preziatuena.

Aurten, aurrekoetan bezala,  eurentzat urte osorako oinarrizko elikagaiak emongo leuskiezen haziak ereingo leukez, eta gainontzekoaren salmentagaz lortutako dirua falta jakezan elikagaiak erosteko erabiliko leukie. Dilistak, garbantzuak, idarrak eta zalga mingotsa, batez be, ereiten ebazan, bere aitak eta arbasoek egiten eben moduan, bere asaba-herenak 1907an Zisjordaniako lur hori erosi ebanetik. Elikagai horreek oso garrantzitsuak ziran eurentzat, funtsezkoak, jateko produktuak uraren faltagaitik asko garestitu ziralako.

1967az geroztik, Zisjordania okupatu ziranetik, ur gehiena israeldarren kontrolpean egoan. Horreek, gainera, egoera are eta larriago bihurtzeko, hasi ziran iturburuak baliobakotzen, batzuetan betoia gainean  botata, iturria guztiz hondatzeko.

Bere aitak, lantzean behin, harro erakusten eutsen bere emazteari eta berari kutxa zahar baten arreta handiz gordetzen eban lurraren salerosketa-agiria. Holan egonda, konturatu zan urrundik berarengana talde bat parajetzen zala, soldadu batzuk tartean, hondeamakina bategaz  eta bere parean egoenean, gerturatu bakarrik ez,  hara non makina bere lurrean sartu eta hau goldatzen  hasi zan! Beraren  lurraren barruan!

Bere harriduraz atera ezinik, amorruz, lur ha berarena zala, bakean ixteko  eta segidan handik urteteko azaldu eutsen. Baina mehatxu gogorren artean, armekaz apuntatuta, hareen erantzuna aztoramenagaz entzun eban: lur hareek eurenak zirala, Yahvek, euren jaungoikoak, eurei bakarrik emon eutsezalako, eta atoan handik alde egiteko, ezpabere bertan behera hilko ebela agindu eutsoen.

Israelgo estatua 1948an sortu zan, halanda ze, 41 urte Nasserren asaba-herenak lur ha erosi eta gero. 2023ko urriaren 7an, Hamasek egindako atentatuaren egunaren baino lehen, Zisjordaniako palestinarrek hilero 100 eraso  jasaten ebezan kolono juduen partetik. Itaun bat: Nori jagoko bidezko defentsaren eskubidea?

Txorierriko albiste garrantzitsuak eta azken ordukoak jaso gura dituzu Whatsapp bitartez?

WHATSAPP: Bidali ALTA hitza 747 406 561 telefono zenbakira.

Izan zaitez berriemale ere. Bidali zure argazkiak, bideoak eta berriak.

Hilero lagun birentzako bazkaria zozkatuko dugu alta hartzen dutenen artean (Baserri Antzokian).