3. maila konbinatua

3.MAILA KONBINATUA ESKAINIKO DU AEK-K Azken urteotan asko aldatzen ari da euskaltegietako ikasleriaren profila. Gero eta denbora gutxiago, gero eta ordutegi sakabanatuagoak. Erronka handia gertatzen ari zaigu euskaltegioi egoera berrirako egokiak izan daitezkeen erantzunak topatzea. Alde horretatik, aurrez aurreko saioak eta on-line uztartzen dituzten ikastaroek aukera zabala daukate, taldekako lana eta auto-ikaskuntza batzen dituztelako. Ezaugarri horiez guztiez baliatu nahi du AEKren ikaskuntza konbinatuaren eskaintzak. Dagoeneko martxan daukagu 3.mailarako eskaintza. Azterketa gainditzera zuzendutako 120 orduko ikastaroa izango da, otsailaren 1ean hasi eta ekainaren 18an bukatuko dena. Astero aurrez aurreko saio bat izango da, lana, berriz, on-line egingo da horretarako bereziki atondu dugun ikastaroan. Lehen eskaintza honetan aurrez aurrekoak bi hiriburutan baino ez dira egingo, Donostiako Irrintzi AEK euskaltegian (Gros) eta Bilboko Indautxu-Irala AEKn. Izen ematea zabalik egongo da urtarrilaren 28ra arte eta 312 euro balio du. Eskaintza berritzaile honen inguruko informazio gehiago nahi izanez gero, e-gela@aek.org helbide elektronikora jo dezakezu, AEKren edozein euskaltegitara jo edota zuzenean Indautxu-Irala AEK (94 4413474) edo Groseko Irrintzi AEK (943 327611) euskaltegiekin harremanetan jarri. Horretaz gain informazio gehiago topatuko duzue www.aek.org, www.praktikatu.blogspot.com eta www.egela.aek.org helbideetan.