Logoa
Logoa
aikor.eus

Ane Baraiazarra eta Jone Goiri, kaleratuta

  Kirolak  Larrabetzu
Ane Baraiazarra eta Jone Goiri, kaleratuta

Ane Baraiazarra eta Jone Goiri larrabetzuarrek Binakako Laboral Kutxa Emakume Master Cup pilota txapelketaren final-laurdenak jokatu zituzten atzo, martxoaren 4an, Markinako frontoian. Larrabetzuarrek 18-8 galdu zuten partida Nagore Aramendi eta Oihana Unanue azpeitiarrek osatutako bikotearen kontra eta, ondorioz, txapelketatik kanpo gelditu dira. Ane eta Jone txapelketan aurrera egitea lortu zuten txorierritar bakarrak ziren.

“Txapelketaren hasieran, ez genuen hain urrun heltzea espero; beraz, pozik gaude egin dugun ibilbidearekin, iaz baino hobeto egin dugulako. Hala ere, apur bat triste gaude atzoko partidan gure maila eskaini ez genuelako. Arerioek beste era batean jokatu zuten: lasaiago, piloteoan, gure akatsaren zain. Guk, aldiz, azkar bukatu nahi izan genituen tantoak. Partida luze egin zitzaigun eta urduri jarri ginen. Pena izan zen, baina datorren urtean berriro saiatuko gara”, esan digu Jonek.

Antolatzaileen esanetan, Markinan egin zen pilota jaialdia “kalitate handikoa” izan zen. “Neskek norgehiagoka lehiatuak eskaini zizkiguten, pilotalekura hurbildu zen ikusle andanaren gozamenerako”, esan dute ohar batean. Pilotari gipuzkoarrak nagusitu dira promozio mailan, batez ere azpeitiarrak. Izan ere, Aramendi eta Unanuez gainera, hauek izan dira final-erdietarako txartela lortu duten bikoteak: Alaitz Badiola (Azpeitia)-Oihana Orbegozo (Azpeitia); Maddi Unanue (Azpeitia)-Naroa Agirre (Zestoa); eta Ainhoa Urien (Abadiño)-Amaia Vicario (Donostia).

Laboral Kutxa Emakume Master Cup pilota txapelketa laster bukatuko da. Hurrengo hitzordua Zamudioko pilotalekuan izango da martxoaren 11n, Lehen mailako final-laurdenak bertan jokatuko baitira. Ostean, bi kategorietako final-erdiak Oñatin jokatuko dira martxoaren 18an. Eta azkenik, martxoaren 25ean, Eibarko Astelena pilotalekuan, final handiak.

Ikusi argazki guztiak handiago

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa