Txapelduna hasiera-hasieratik nagusitu zen finalean. Partidaren lehenengo txanpan, markagailuak 1 eta 8 adierazten zuen, eta Espinar arriskatzen hasi zen. Aldea apur bat murriztu zuen arren, min hartu zuen eskuan eta orkatilan. Gainera, Etxaniz sendo ibili zen eta ez zion arerioari irabazteko aukerarik eman. Bestalde, kategoria mistoko finalean, Miriam Arrillagak Miren Larrarte hartu zuen mendean (22 eta 11).
Finalak ez ziren oso zirraragarriak izan, oreka handirik egon ez zelako. Hala ere, antolatzaileen esanetan, “tanto bikainekin gozatzeko aukera egon zen eta emakumeen esku-pilotak hazten jarraitzen du”. Era berean, giro bikaina egon zen eta frontoia jendez gainezka bete zen. Bestalde, antolatzaileek saria eman zioten Txokoan Larrabetzuko taldeari. “Haiek izan ziren aitzindariak: lehen elkartea sortu zuten eta emakumeen esku-pilotari bultzada handia eman zioten”, esan zuten.