“Unibertsitatera joateko arazoa Larrabetzuko zein Lezamako eta Zamudioko gazteok dugu. Zuzeneko autobus bakarra egoteaz gain, hura oso goiz ailegatzen da unibertsitatera, 07:30ak inguruan, eta eskola-saioak 08:30ean edo 09:00etan hasten dira. Horregatik, gazte asko autoz joaten dira Leioara edo autobus bi hartzen dituzte: bata, Larrabetzutik Erandiora, eta bestea, Erandiotik unibertsitatera. Aukera batek zein besteak gastu ekonomikoa dakarte”, azaldu digute. “Bestalde, Txorierriko gainerako udalerriak eta Galdakao 2. tarifa-gunean daude; Larrabetzu, berriz, hirugarrenean. Ondorioz, gehiago ordaindu behar dugu: Larrabetzu-Lezama, 1,5 euro; Lezama-Zamudio, 1,35 euro. Larrabetzu Txorierriko udalerria da eta beste tarifa-gune batean egoteak ez du zentzurik. Gainera, Larrabetzuko ikasleek autobusa hartu behar dute Derioko institutura joateko, eta larrabetzuarrok Galdakaon ditugu anbulatorioko eta ospitaleko mediku-zerbitzuak”.
Urtarrilaren amaiera arte sinadurak batuko dituzte change.org plataforman, Larrabetzu 2. tarifa-gunean sar dadin eta Leioako unibertsitatera joateko autobus-zerbitzua areagotu dadin. “Joan den urteko otsailean, udalak Larrabetzu 2. tarifa-gunean sartzeko eskaera egin zuen, baina aldundiak ezetz erantzun zuen. Bizkaiko Foru Aldundiari eta Bizkaiko Garraio Partzuergoari udalerria tarifa-gunez aldatzeko eskatzen jarraituko dugu, eta, halaber, erakutsiko dugu larrabetzuarron arazoa orokorra dela eta guztioi berdin eragiten digula”.