Udalarekin lankidetzan, herriko saltokiak arduratuko dira poltsak eta tuperrak banatzeaz. Tuperrak eta poltsak oparituko dizkiete halakoak erabili ohi dituzten herritarrei, “orain arte hondakinen murrizketaren alde erakutsitako konpromisoa saritzearren”. Bestalde, tiket-sistema erabiliko da poltsak eta tuperrak herritarren artean banatzeko: egindako erosketa bakoitzeko tiket bat jasoko dute eta bost tiket batzen dituztenean hartu ahalko dute poltsa bat edo tuper bat. Hainbat dendatako tiketak batu ahalko dituzte, eta nahiago duten lekuan trukatu.
Hango udalak jakinarazi duenez, Larrabetzu 2025 parte hartzeko prozesuaren harira hondakin plastikoak murrizteko proposamena egin da. Udalak proposamena aintzat hartu du eta tuperrak eta barazkiak eta fruta gordetzeko oihalezko poltsak banatuko ditu herritarren artean. Guztira 250 poltsa, 150 tuper handi eta 100 tuper txiki banatuko dira.