Larrabetzu 2. tarifa-gunean premiaz eta behin-behinean sartzeko eskatu diote Bizkaiko Batzar Nagusiek Aldundiari

Garraio eta Mugikortasun Jasangarrirako batzordean, Bizkaiko Batzar Nagusiek aho batez onartu du EH Bilduren arauz besteko proposamena, Larrabetzu Bizkaibuseko tarifa-eremua aldatzeko. Koalizio abertzaleak Aldundiari eskatu dio Larrabetzu 2. tarifa-gunean “premiaz eta behin-behinean” sartzeko, Bizkaiko Lurralde Antolamendurako Batzordeak azaroan Bizkaiko zonifikazio berriaren azterlana amaitu arte itxaron barik. Raul Mendez batzordekideak adierazi zuenez, irailean, unibertsitateko ikasturtea hasterakoan, bereziki azaleratuko da Larrabetzuk zonifikazioarekin duen arazoa, “bertako gazte askok unibertsitatera joaten den autobusa hartzen dutelako, gehiago ordainduta”.