Hango udalak jakinarazi duenez, Larrabetzuko zinekluba martxan ipini dute berriro. Horrela, irailaren 20an Bost teilatu filma aurkeztuko da osoko bilkuren aretoan. Saioa 19:30ean hasiko da, eta pelikula ikusteaz gainera, solasaldia egingo da haren zuzendarietako batekin; Eñaut Castagnetekin, hain zuzen. Pelikula Geuretik Sortuak egitasmoaren baitan egin da, eta bertan bost teilaturen azpian gertatzen diren istorio laburrak batu dira.
Istorioetako bat da Krak, Amancay Gaztañagak eta Erika Olaizolak zuzendua eta dolua ardaztzat duena. Arnasa Raul Barrerasena da eta baserri batean, mendian, bizi diren aititeren eta ilobaren arteko harremana jaso du zuzendariak bertan. Bestalde, Josu Martinezek Hitzak lanean aurkeztu du Michelleren istorioa, zeina Parisa itzuli baita eta pospolo-kutxa batean euskarazko hitz batzuk topatu dituena. Leire Egañaren Erlojupekoa lanean mezulari batek paketea garaiz entregatzeko bizi behar dituen komeriak batu dira, eta, azkenik, Castagnetek zuzendutako Muga film laburrean aurkezten da Afrikako gazte baten istorioa, Frantziara joan nahi duena eta, baserritar batek lagunduta, handik hurbil dagoen baserri batean hertsitu dena.
Txorierriko albiste garrantzitsuak eta azken ordukoak jaso gura dituzu Whatsapp bitartez?
WHATSAPP: Bidali ALTA hitza 747 406 561 telefono zenbakira.
Izan zaitez berriemale ere. Bidali zure argazkiak, bideoak eta berriak.
Hilero lagun birentzako bazkaria zozkatuko dugu alta hartzen dutenen artean (Baserri Antzokian).