Beste alde batetik, Ernaik antolatuta, zapatuan, maiatzak 3, Larrabetzuko, Busturialdeko, Zornotzako eta inguruko herrietako gazteak Bizkargira igoko dira. Hitzordua 16:00etan ipini dute Larrabetzuko plazan. Mendi tontorrean, “Gaur egungo oldarraldi faxistaren goraka” mahai-ingurua izango da, bertan parte hartuko dute Jon Ormaetxeak, Ainhoa Egiluzek eta Txomin Aiartzak. Ondoren, ekitaldia egingo dute, eta haren ostean, musika izango da: Dj Party & Tiza + Gorriontxu eta Laztana.
Ohikoa denez, maiatzaren lehen domekan Bizkargi Eguna ospatuko da eta bertan omenaldia egingo zaie 1937an faxistei aurre egin zieten gudariei. Mendi tontorrean egingo diren ekintzez gainera, Larrabetzun ere ekintzak antolatu dituzte maiatzaren 3rako eta 4rako. Horrela, zapatuan, 12:00etan, XIX. Bizkargi Igoera izango da, eta 15:00etan bazkaria egingo da. Eguen Bakoitiak taldeak 18:00etan egingo du. Domekan, bestalde, txosna zabalik egongo da 17:00etatik aurrera, eta 18:00etan ekitaldia izango da. Eguna biribiltzeko, 18:30etik aurrera taloak egingo dira eta erromeria egongo da Kittu taldearen eskutik.