Lezamako Udalak sei informazio-taula ipini ditu herrian; bakoitza leku esanguratsu batean: Kurtze ermitan, Andra Mari elizan, herriko plazan, Mikel Zarate plazan, Oxangoiti baserrian eta Athleticeko instalazioetarako sarbidean. Tauletako alde batean, lekuaren edo ondare-eraikinaren gaineko informazioa dago; eta beste aldean, Athletic Club futbol taldekoari buruzkoa. Azaldu dutenaren arabera, taula horiek bisitariak herrira erakartzeko jarri dira, eta, horretarako, hitzarmen bat egin da futbol-klubarekin.
Lezama Bizirik elkartearen ustez, hiru taula hauek ez dute Euskal Ondareari buruzko Legea betetzen: Andra Mari elizaren ondoan ipini dena, Kurtze ermitaren ondoan ipinitakoa eta Done Jakue bidean, Athleticeko instalazioetarako sarbidean, jarri dena. Gainera, uste dute leku horietako irisgarritasuna eta ikuspena oztopatzen dituztela. Horregatik eskatu diote Udalari taulak kentzeko, baina hark erantzun die taulak ez dituztela kenduko, “herriarentzat onak direlako”. Auzia Aldundira eta Eusko Jaurlaritzara eraman baino lehen, elkartea eta Udala bildu ziren euren iritziak eta jarrera partekatzeko. Elkartearen esanetan, “Udalekoek aitortu zuten ez ziotela inori baimena eskatu taulak jartzeko, baina esan zuten berehala eskatuko zutela. Era berean, mugitu behar badituzte horrela egingo dutela adierazi zuten, baina ez dituztela inolaz ere kenduko”. Jon Ander Aurrekoetxea Lezamako alkateak, bestalde, adierazi du aste honetan bertan aurkeztuko dutela eskaera formal bat Aldundian, taulak ontzat eman ditzaten. “Eta zerbait aldatu behar badugu, aldatuko dugu”.