Bihar, Eskualde Txapelketaren finalak jokatuko dira Lezaman

Finalen zehetasunak atzo eman zituzten ezagutzera, eta prentsaurrekoan hauek hartu zuten parte: Jon Ander Aurrekoetxeak, Lezamako alkateak; Jaime Ugartek, Lezamako Pilota Elkartearen presidenteak; eta Koikili Lertxundik, Eusport enpresaren koordinatzaileak. Oso final bereziak izango dira, Eskualde Txapelketak 60 urte bete ditu eta.

Partidak bihar, otsailak 22, izango dira 19:30etik aurrera. Promesen kategorian, Oskozek (Lantz) eta Apezetxeak (Goizueta) osatutako bikotea Alberdi (Zizurkil) – Aizpitarte (Altzo) bikotearen aurka ibiliko da. Bestetik, lehenengo mailan Salaberria (Goizueta) eta Uriondo (Munitibar) norgehiagoka arituko dira Zubizarretarekin (Ataun) eta Otaduyrekin (Berriz).

Bestalde, prentsaurrekoan  “Txorierrin kirola ere euskaraz” egitasmoa aurkeztu zen. Egitasmo hori Txorierriko Zerbitzuen Mankomunitateak bultzatzen du, eta kirolean euskararen erabilera sustatzea du helburu. Horri lotuta, sari bereziak egongo dira zaleentzat, ohorezko aurreskua dantzatuko diete pilotariei eta Leire Etxaniz pilotariak postalak banatuko ditu.