Sarira Lehen Hezkuntzako ikasleentzat (6-12 urte bitartekoentzat) euskaraz sortutako kontakizunak aurkeztu daitezke, jatorrizkoak, beste inondik moldatu gabeak eta aurretik saririk jaso edo argitaratu ez direnak. Lehiaketan 18 urtetik gorako lagunek hartu ahalko dute parte. Gutxienez 10 orrialdeko eta gehienez 50 orrialdeko lanak aurkeztu ahalko dira, Din-A4 formatuan eta tarte bikoitza utzita. Lanak maiatzaren 31ra arte bidali daitezke Lezamako Udaletxera (–Mikel Zarate Haur Literaturako Saria– Aretxalde 1, 48196 Lezama). Hiru alde bidali beharko dira, agerian idazlearen nortasuna azaldu barik, eta horiekin batera gutunazal txiki bat: kanpoan idazlanaren izenburua adieraziko da; eta barruan, egilearen izen-deiturak, helbidea, telefonoa eta nortasun agiriaren fotokopia.
Epaimahaia Leire Bilbao, Miren Agur Meabe eta Xabier Mendiguren idazleek osatuko dute, eta erabakia hartzeko azken eguna ekainaren 30a izango da. Irabazleak 3.000 euroko saria jasoko du, eta Elkar argitaletxeak argitaratuko du eleberri edo ipuin saritua, saria jakinarazten denetik sei hileko epean, behar diren marrazkiez hornituta.