Txakolinaren eguna 18. aldiz egingo dute domekan, ekainak 2, Hilario Astorki plazan. Azoka 11:00etatik 17:00etara izango da, eta plazan 36 saltoki ipiniko dira. Besteak beste, nekazaritzako produktu hauek egongo dira ikusgai eta erosgai: eztia, gazta, ogia, euskal pastela, barazkiak, loreak eta kontserbak. Gainera, goiz osoan zehar Bizkaiko Txakolinaren 2018ko uzta dastatzeko aukera egongo da herriko bost upeltegiren eskutik: Garkalde, Magalarte, Basalbeiti, Erdikoetxe eta Larrabe. Kopak eta tiketak udal postuan ipiniko dira salgai.
Kurutze dantza taldea 11:30ean irtengo da kalejiran, eta umeek dantza-saioa eskainiko dute 11:45ean, pilotalekuan. Azokari 13:00etan emango diote hasiera ofiziala: kortxoa aterako da, brindisa egingo da eta Lezamako txakolinaren enbaxadorea izendatuko da. Horrezaz gainera, oroitzapenezko plaka emango diete Jose Antonio eta Pedro Mari Dañobeitiari, eta Ekidazu abesbatza arituko da. Bertso saioa ere izango da Anjel Mari Peñagarikanorekin. Aurkezpena Pedro Mari Goikoetxea kazetariak egingo du.
Musika-giroa egongo da goizean zehar, eta 12:30etik aurrera Basatxerri-Eusko Labeleko solomo errearen pintxoak dastatu ahalko dira. Bestalde, tailerrak antolatuko dira lau urtetik 12 urtera bitarteko umeentzat; eta puzgarriak, txikienentzat. Azkenik, erromeria egongo da plazan 15:00etatik 17:00etara. Txakolinaren eguna Lezamako Udalak antolatzen du urtero.
Txorierriko albiste garrantzitsuak eta azken ordukoak jaso gura dituzu Whatsapp bitartez?
WHATSAPP: Bidali ALTA hitza 747 406 561 telefono zenbakira.
Izan zaitez berriemale ere. Bidali zure argazkiak, bideoak eta berriak.
Hilero lagun birentzako bazkaria zozkatuko dugu alta hartzen dutenen artean (Baserri Antzokian).
