Juan Mari oso ezaguna eta maitatua izan da Lezaman. Izan ere, herriko taldeak Herrien Arteko Txapelketa ekainean irabazi zuenean, pilotariek Dañobeitiari bere etxean eskaini zioten txapela. Bihar, omenaldi bi jasoko ditu Dañobeitiak: batetik, Lezamako pilota-eskolaren eskutik; eta bestetik, berak irakatsitako pilotarien eskutik. Xabier Euzkitze eta Pedro Mari Goikoetxea kazetariek hartuko dute parte ekitaldian.
Lezamar petoa
Juan Mari abuztuaren 17an hil zen, 77 urte zituela. Pilotari profesionala izan zen 1976tik 1987ra bitartean, eta erretiroa hartu zuenean jarraitu zuen pilotaren alde lan egiten, batez ere, Lezamako pilota elkartean. Bertan monitore eta idazkari ibili zen eta hainbat eta hainbat gazteren maisua ere izan zen: Iker Amarika, Txaber Zabala, Gorka Artetxe, Iñigo Aurtenetxe… “Bigarren aita genuen: hurbila, berritsua, atsegina… Beti laguntzeko prest agertzen zen, eta oso harreman ona zuen guztiokin: gurasoekin, udalarekin, pilotariokin… Gainera, lezamar petoa zen eta saltsa guztietan sartuta ibiltzen zen, pilotan ez ezik; herriko jaietan ere, adibidez. Bere heriotzak ustekabean harrapatu gintuen. Oso triste izan zen”, esan digu Iñigo Aurtenetxe pilotariak.
“Bizitza osoa ibili da Lezamako Pilota Klubean: gaztetan, pilotari; eta profesionala izateari utzi zionean, entrenatzaile eta mahaikide. Hainbat urte eman zituen gurekin elkartean eta herriak izugarri estimatzen du. Kanpoko klubek ere dolumina adierazi digute. Eta horregatik inoiz baino jende gehiago hurbilduko da frontoira, beti ere edukieraren % 60 errespetatzen, noski. Izugarrizko giroa egongo da”, aipatu du Jaime Uriarte Lezamako Pilota Klubaren presidenteak.