Lezamako Txakolinaren Eguna ekainean ospatu ohi da, baina udalak eta ekoizleek erabaki zuten aurtengo edizioa urrira atzeratzea; hala ere, datorren hilean ere ez da egingo. “Atzeratzeko erabakia hartu genuenean, espero genuen osasun-egoera hobeto egotea. Baina gaur egungo segurtasun-neurriak kontuan izanda, aurtengo edizioa bertan behera uzteko erabakia hartu dugu. Izan ere, esandako neurriek debekatzen dituzte jende-pilaketak eta kalean kontsumitzea; eta hortaz, kalean txakolina dastatzea”, adierazi du Jon Ander Aurrekoetxea alkateak.
Arduratsuak izateko deia egin die Aurrekoetxeak herritarrei, eta itxaropentsu azaldu da datorren urteari begira. “Txakolinaren Eguna oso ekintza berezia da lezamar guztiontzat eta asko tristatzen gaitu hura ospatu ezin izateak. Hala ere, pandemian gaudela, osasun publikoa lehentasuntzat jo behar dugu. Espero dezagun 2022an normaltasun osoz gure txakolin apartez gozatu ahal izatea, eta Txakolinaren Egunean Lezaman sortzen den giro ezin hobeaz”.