Pagoluzeta zirkuitua prest dago, XCO lasterketarako

Domekan, Txirrindulari Kirol Elkarteak (Zorribike) XCO lasterketa antolatuko du hirugarren aldiz Lezaman. Zirkuitua Viveron dago, Guardetxea aldean, herrigunetik hiru kilometrotara. Hauek dira ezaugarriak: 4,5 kilometro luze eta 248 metro desnibel. Guztira, 250 lagunek hartuko dute parte lasterketan.   

Anoa-postu bi egongo dira ibilbidean: bata, helmugaren alboan jarriko dute; bestea, aldapan gora, 250 metrotara, bulego iraunkorraren inguruan. Taldeen paddock-ak lehenengo aparkalekuan (tiro-eremuan) eta bigarrenean jarriko dira; hirugarrena karabanek eta publikoak erabili ahal izango dute. Antolatzaileek esan dute maiatzaren 8an Viveroko errepidea moztuta egongo dela bigarren aparkalekutik laugarrenera, 7:00etatik 16:00etara. Gainera, zonalde horretan ezin izango da autorik aparkatu.

Lasterketa Euskal Herriko XCO egutegiaren barruan dago; Txorierriz gainera, bederatzi herritan egiten dira lasterketak: Erandion, Bilbon, Balmasedan, Gorlizen, Amurrion… Lezamako saioa hiru txandatan egingo da. Lehenengoan, 9:15ean, kadete eta master 40, 50 eta 60 kategoriak abiatuko dira; bigarrenean, 10:45ean, master 30, gazte eta emakumezkoen elite eta gazte kategoriak; eta hirugarrenean, 12:45ean, elite eta 23 urte azpiko kategoriak.

 

Informazio gehiago:

zorribike@zorribike.com

https://greenseriesxco.com/

 

Txorierriko albiste garrantzitsuak eta azken ordukoak jaso gura dituzu Whatsapp bitartez?

WHATSAPP: Bidali ALTA hitza 747 406 561 telefono zenbakira.

Izan zaitez berriemale ere. Bidali zure argazkiak, bideoak eta berriak.

Hilero lagun birentzako bazkaria zozkatuko dugu alta hartzen dutenen artean (Baserri Antzokian).