Ekintza guztiz zehaztuta ez dagoen arren, antolatzaileek aurreratu dute 10:00etan plazan batuko direla eta handik Eguskitza errekaraino oinez abiatuko direla; nolanahi ere, hara nor bere kabuz joateko aukera dago. Goizeko 10,30etik 12:00etara erreka eta bere ingurua bisitatuko dute, eta azalpenak emango dituzte egitasmoaren gainean. Ondoren, ekimen sinbolikoa egingo dute eta idazki komun bat sinatuko dute zabortegiaren aurka eta Eguskitza errekaren alde; esandakoaren arabera, idazkia da iaz EAJk eta EH Bilduk egindako adierazpen instituzionala. Jarraian erromeriatxoa egongo da, kopaua eta trikiti-soinua.
Promociones Zubiarraun enpresak aurkeztutako txostenean jaso den moduan, azpiegiturak 368.549 metro koadro hartu, eta hauek izango lituzke: hondakinak baliarazteko instalazioa, lurren bankua, bideak eta zerbitzu-instalazioak, lixibatuak tratatzeko gunea, zabortegia, ingurumen-interpretaziorako gela, bulegoak eta aparkalekua. Zabortegiak 3.907.000 metro kubikoko edukiera izango luke eta bertan hondakin geldoak eta ez arriskutsuak hartuko lirateke. Herritarrak, elkarteak eta eragileak hasieratik azaldu dira egitasmoaren aurka, eta, gainera, udal-txosten baten arabera, esandako eremuan zabortegia egitea bideraezina da, ez baitira betetzen, besteak beste, lurralde-antolamenduko arauak, planteamendukoak eta ingurumena babesteko legeriari lotutakoak.