Aurrekoetxea 2015ean ailegatu zen Lezamako alkatetzara. Hango Uri Batzarrak azpimarratu duen moduan, “harrezkero proiektu esanguratsuak egin dira herrian, hala nola Kurtze auzoko tren-geltoki berria eta errepide azpiko puntu beltza ezabatzea, gimnasio, ikasgela eta kultur gela berriak eta Larrabetzurako bidea oinezkoentzat egitea. Horrezaz gainera, nabarmendu dituzte 0 urtetik 18 urtera bitarteko gazteentzako aisialdirako udal-azpiegiturak: haurrentzako gela, ludoteka, Gaztegunea eta Gaztelekua. “Beste batzuen artean, lan horiek ekarri dute Lezama udalerri moduan haztea eta herritarren bizi-kalitatea hobetzea”, esan dute.
Aurrekoetxeak aurreratu du “hurrengo agintaldiari begira Lezama hazten jarraitzea ahalbidetzen duen proiektuan” murgilduta dagoela. Proiektu hori garatuko du “erantzukizunez eta entzute aktiboa eta erakundeen arteko harremanak kontuan hartuta, egitasmo garrantzitsuak egiten jarraitu ahal izateko”. Bestalde, hautagai jeltzaleak berretsi du giza arloaren eta ingurumenaren aldeko apustua. “Pandemiak nabarmen baldintzatutako legealdi batetik gatoz, eta egoera horrek hainbat alderditan kaltetu ditu herritarrak. Horregatik, pertsonek gure lehentasuna izaten jarraituko dute, eta euren osasuna eta bizi kalitatea lehenesten jarraituko dugu. Baita Lezamako ingurune naturala zaintzen eta balioesten ere”.